Lengzem atanga lakkai!!

(Chhuah tur awm loh aiah midang ta lakai ve mai ang..!!)

Ka thai Mampui....

Country Music leh nupa inthenna hi thil inkawp tlat ang mai nia sawi an awm thin. Chuti êma sawi tur chu ni lo mah se, country music leh nupa inthenna hi kan nunphung nen hian a inhnaih hle zawng a nih ngei a rinawm. Mahni han insawi ta ila, hmeichhe pakhat kum 25 zet ka lo hmelhriat tawn nen hian kum 10 zet chu kan innei ve ta. He hmeichhia hian, ka nun min her danglamsakin thil hlu tak a thlen a, chu chu ka tan chuan inneihna ai maha hlu a ni. Chu chu country music hla satu dangte aia ka vanneihnaah ka ngai hial a ni.Zan Khat HlimnaNupui neih chu mi tamzawk tan chuan thil pangngai a ni ngei ang. Kei ka tan erawh chuan malsawmna namen lo dawnna a ni. Ka tunhma nun ka han chhût lêt hian, rawlthar nia tlangval ka hriat tantirh laite chuan nupui pangngai ka nei ve thei ang tih hi ka ngaihtuah phâk ngai lo.Engpawh ni se, chutih hun laia ka thu hriat tam ber chu country music star nih nawmzia te, nupui pasal an neih hnu pawha an luck zia te, an nun chu uirena leh nupa inthenna chanchin tharin a luah nasat ziate a ni mai. Chutih hun laia kan hla hriat larte chu “Your Cheating Heart” tih te, “Don’t the Girls All Get Prettier at Closing Time” tihte a ni a. Chu’ng hlathu ang chiah chuan ka hringnun chu ka hmang reng bawk a. Ka unaupa Ricky-a nen band kan din a, kan khua, Marshville (North Carolina) leh a chhehvelah chuan kan zai kual thin a. VFW hall-ah te, Moose Lodge-ah te, mimal party-na hmunah te pawh hriat kan hlawh ve fe a ni. Chutih lai chuan kum 17 mi ka ni a. Nupui neia inbenbel te chu, ka ngaihtuahna mawng kilah pawh ka dah ngai lo. Hlim taka zan khat hun hman liam dan tur... tih vel bâk hi vei tak tak ka neih pawh ka hre ngai lo.Lib HatcherMahse, Charlotte (N Carolina) khuaa music club pakhat Country City USA an tihah chuan zan khat chu ka tei lût mai mai a. Chuta tang chuan ka nun chu a inthlak danglam ta vek mai a ni.Dawhkan âwl pakhat thutchilhin a fâlin ka thu a. Hmeichhe sam buang, tereuhte, fit nga âwrh tur hian mi rawn pan a, min rawn thutchilh chawt a, “Lib Hatcher ka nia, he Club neitu hi ka ni,” a rawn ti teh ngawt a. Zangkhai zeta a han chêt vel dan phar phar chu ka lawmzawng tak a ni a, ka zai a lo ngaithlâk thin thu leh, a duh zawng tak a nih thu min hrilh nghe nghe a.Thihna LamtluangMahse, han hnaih vak thei dinhmunah ka ding lo. Chutih lai chuan kham ko sâng tak pana chak taka sakawr tlan lai mek ang hi ka ni a. Thununna hian mi thleng phak lo. Kum 14 mi ka nih atangin ni tin hian zu ka in loh leh ruihhlo tih ka ching a. Kumah hrem rual ka nih hma atangin puitlingte pawi khawih aia nasa ka khawih tan a. Naupang sual an khungna inah pawh ka tlangnel fe hman a. Chuvangin high school pawh zir chhuak hlei thei lovin khawlaiah ka vak rawlai chho ta zel a. Ka nun chu... Marshville khaw pastor-in min hre lo, mahse police zawng zawngin min hre vek! Chu chu a ni mai!Vawi khat chu rui â buang chungin ka û car ka ru chhuak a, a ruang hlawm tlâk loh khawpin a car chu ka sawp chhiatsak a. Ka chêtsual dan ka hre lo va, ka dam theih dan pawh ka hre hek lo. Min mantu police chuan darkar khata mel 145-a chaka ka khalh vangin min man tih min hrilh a, ka ring tawp mai. Pawi ka khawih satliah a ni lova, ka khawih chhan leh ka khawih dan pawh hi ka hre mumal ngai lo. Ka nun chu a bawraw tial tial a. Ka banin jail bang zut a tum ngar ngar a, ka ke-in kan veng thlanmual lam pan a tum ngar ngar thung a, min inchuh laklawh avangin ka la dam ni vel mai maiin ka hria.Ka pawi khawih ka chinfel hmain, Marshville-ah bawk chuan dawr ka rawk avangin min man leh a. Bail-a min chhuahtir lai ngeia suahsual rawng bawl leh ka nih avang chuan thuneitute chuan an haw takzet a, ka chung a rip ta hle mai. “Ka tâng ang em?” tih ni lovin, “Kum engzat nge ka tan ang?” tih chu zawhna chiang sa a ni a, chu zawhna chu ka chhan tur a ni lo, roreltu chhan tur a ni. Ka nun chu ka thu thua khalh tur emaw ka lo ti a; ka thu ta tlat lo. Zai Kahpah TurinKa nuna thil pangngai ve deuh nia ka hriat awmchhun chu zai chu a ni mai. Ka zai thei ve fu a, mi hriat pawh ka hlawh ve fu. Mahse, keimah aia zaithiam, court case nei ve miah lo hi sang tamtak an awm. Chu bakah, kei ka tan chuan zai lam thil chu eizawnna a ni lo, nawmsip lam thil a ni a, a changa ruk ru lova sum han hlawhchhuah vena satliah a ni mai. Rui lova mipui hmaa zai te phei chu ka tlin loh bâkah, a peih hian ka peih lo hrim hrim. Chuti takin ka ngai thutak lem lo. Mahse hlawh a awm tlat a. Chutianga sum han hlawh leh zawk chu ka duh a, court case nei chungin Country City hi ka pan a ni.Country City hi kan khuaa Club lian ber pahnih zinga pakhat zawk a ni a. Inzaisiak an buatsaih mek a, chuta tel ve chu ka tum rilru deuh a ni. Mahse, chumi zana Lib-i nena kan thut dun atang chuan thutlûkna ka siam thiam loh min siamsaktu ka nei tan ta tlat a ni.Duh Aia Hlawhtling!A thu hrimin ka duh aiin ka hlawhtling a. Inzaisiakah chuan ka tel ve a, pakhatna ka ni roh a. Ka lawm vak lo. A hlawh chu ka duh a, mahse mawhphurhna a ken tel chu ka nunpui peih lo a ni ber mai. A lawmawm viau a, “Hunbi neiin kan club-ah hian rawn zai thin la...?” tiin min han sawm ta ngei a. Thil engpawh, hunbi nei chi reng reng hi ka ning vek! Chaw te hi ka heh viau na-a hunbi fel tak neia chaw ei thlap thlap chu ka peih miah lo. Mahse, ka kalna apiangah police mit ka la riau tawh tlat a. Thil ka ru ngam tawh si lo, sum ka duh ve tho si. Country City-ah chuan, sum mamawh vang liau liauvin hlawh neiin kar khatah zan nga ka zai ta zak zak mai a. Ka lo ti thei fu lehnghal a.Mahse, roreltu nena kan inhmachhawn hun tur chu ka ngaihtuah roh roh reng mai a. Tan-ina tan hmabak tih inhre reng chunga club-a hlim taka han zai vak vak mai chu har ve tak a ni.Country City intihsiaknaa zaithiam bera thlan chu ka ni laklawh tawh si, ka zai ngaina lah chu an pung ang tual tual a. Ka lar zawh poh leh min tantir hunah ka hmingchhiat a zual ang a, min thlangtu club pawh ka timualpho nasa dawn a ni tih chu ka hre ru kar mai si a. A tirah khan lo sawi ila, min thlang lo law law sela... ti tein ka ngaihtuah a. A sawt tawh si lo. Min thlang a, ka lar ve laklawh tawh bawk si. Min ngaisangtu an tam zawh poh leh ka chhungril nun chu a buai zual ta mai a. Zai tura ka din veleh hian mipui chu an lo ding suau a, an lam luih luih thin lehnghal a. “Kan ngaisang lutuk che!” an tihte hian ka haw hlur tawh mai a. Khawvel chawp chuan tlanbosan daih hi ka duh a. Ka tlanbo chuan, min man leh hunah min hremna a rit ting a ni mai bawk si. Chuti chunga dawhsana nui var var chunga hlimna hla han sak chu har tak mai a nia!Sual Puan HunKa hlim lo tih Lib-i chuan a hriat rûkna a lo rei tawh a. Thil awmzia min zawt ta a. “A.. court case ka nei a...” tia inpuan a ngai ta nge nge a. Thil awmzia zawng zawng ka hrilh a. Chu club tihmingchhetu mai nia ka inhriat dan te ka sawi ta vek a.Lib-i chu a ngawi ngal mai a. A mitmeng chu ka han zir thin a. A lawm lo tih ka hmu thei. Mahse, a thinrim lo va, a zâm hek lo.A lo dâk chhuak a. “Court-a i kal hunah chuan ka lo kal ve ang a, i lamah tangin i bulah ka ding ang,” a ti ta mai.Beidawnna Thawveng!Ka naupan lai atanga vawiin thleng hian lamtang ka neih ka la hre lo. Ka zai rimawi mila ke pera lam dual dual hi ka hmu fova, min lawma min chibaitu pawh ka hmu ve thin. Harsatna ka tawha lamtang erawh chu ka nei ngai lova, chutiang mi chu an awm thei ang tih pawh ka ngaihtuah phâk lo.Ni a liam a. Court-a inlan hun a lo thleng ta. A sawi ang tak tak chuan Lib-i chuan court room-ah chuan min kalpui ta a.Ka ukil chuan, “Randy, i buaina ka chingfel tam ve ta fu mai. Tuna mi hi zet hi chu a khirh ta. I tan hun tur kum nga-a ka tihtawisak theih che chuan tih theih sâng ber tiah ka inngai ang,” tih chu a thu min hrilh hnuhnung ber a ni. Chu thu chiah chu beisei neiin rorelna inah chuan Lib-i nen chuan kan inzui lut ta a ni.Beidawnna vawrtawpah hi chuan kan thawveng leh letling hi a lo ni a. Eng dang vak ka ngaihtuah tawh lo. Ka chiangin ka hria! “Mi pawh kum tamtak an tang a, an thi bik lo!” tih velte ka ngaihtuah kual mai mai tawh a. Beisei Phak Loh ChhantuMahse ka sira Lib-i lo thu ve chuan min thlamuan takzet a. Country Club zahawm tak neitu a ni. Tlangval sual pakhat helaia min kalpui avang hian amah leh a Club zahawmna a tlahniam zo vek dawn tih pawh a hria ang. Mahse, ka bulah a thu tlat a ni. Ka hrethiam pha lo.Dan pangngaiin lawyer leh roreltute chuan ka chungchang chu an sawi kual a. Ngaihven pawh ka ngaihven vak lo, ka tan rei zawng tur velah an inhnial mai mai ni hian ka hre tawh a. Kum nga aiin a tlem dawn lo hrim hrim a. Thutlukna an siam têp tihah chuan, ka thutpui Lib-i chu a ding thut a.“Your Honour...”A reh thuap mai a, roreltu thleng chuan an meng phawkin ka hria.“Club zahawm tak neitu ka ni a. He tlangval hi ka club-ah, zaithiam ber lawmman latu ni thei khawpa talent nei tha a ni. Tunah ka club-ah, hun puma zaia ei zawngin hna a thawk a. A pawi khawih a sim chianzia min hrilh a, zaia a inhman zel chuan sualna kalsanin hmabak duhawm tak a nei ngei ang tih ka hria a, ka tiam ngam bawk. A nun chungah mawh ka phur ngam a, khawngaihtakin min ring la, ngaidam turin ka ngen a che.”A reh lehzual sauh a. Mipui chuan roreltu chu an en thup a, roreltu chuan Lib-i chu an en vawng vawng thung a. Chutah, hmanhmawhna nei miah lo ni awm khawpa uluk hian kei chu min han en leh vang vang a.“Tlangval, tun tum chu ka chhuah leh ang che. Mahse, eng thu pawh ni se, ka hmaah i rawn inlan leh a nih ngai chuan, rei tawk tak tang nghal turin rawn inbuatsaih la, tan ina ken luh theih awmchhun - ha nawhna - rawn keng nghal ang che! I hria em?”Hre tak ka ni! Ngaihdam tlâk loh hi ngaihdam ka ni a, hei aia ngaihdamna sâng hi chan tur ka nei ngai tawh dawn lo tih pawh ka hria. Randy, I va han vannei em! tiin keimah leh keimah ka inbe mawlh mawlh a. Mahse, ka han ngaihtuah chiang a, ka vanneihna lantir tura tih engmah ka nei lo, Lib-i thiltih liau liau ni berin ka hria. He hmeichhia hian keimah ka inhmuh dan aia thûkah hian, keimahah hian hmuh a nei a ni ngei ang.Lib-i thluak hmanga zai chu!Chumi zana club-a ka han zai mai chu. Ka engkim zawng zawng hian ka zaiin ka hria. Nuam ka ti a, ka hlim bawk a, engthawlna hahdamthlakzia hi ka lo la hre ve ngai lo a ni ber awm e. Nia. Lib-i chuan hmuh a nei a ni. Zan khat chu mipui tin hnuah min be fal a, “Randy, zai hi a kahpaha eizawnna atana hmang lovin hun puma eizawnna atan i hmang thei lo’m ni? I zai hian i famkim tlat a ni.” a ti a.Mak deuh mai chu, guitar chord te hi ka ngaihtuah a, drums rik dan mawi te hi ka ngaihtuah a, rimawi tih mawi dan vel hi chu ka ngaihtuah vak vak a, mahse keima dinhmun dik tak leh ka hmabak dik tak hi ka ngaihtuah tlem a, ka ngaihtuah peih meuh lo a ni ber mai. Tun hi inngaihtuah hun a ni a, hetia tal mai mai hi a dik lo a ni. Lib-i hian rinthu a sawi ngai lo, dik nia a hriat a sawi a, a sawi angin a ti mai bawk a. Chuvangin, ka inngaihtuah takzet a tul ta a ni. Hmabak ngaihtuah ngam lohna hi dawihzepna chi khat a lo ni.“Nia... tum chhin ila,” ka’n ti ve ngawt a. Zai chu nuam ka ti a, ei zawn hrim hrim hi nuam ka ti lo! Ka huphurh tlat. Eizawnna ka hriat chhun chu dawr rawk kha a ni mai a. Sawi chhuah dan pawh ka thiam lo.“Mahse, eizawnna lam hi ka thiam vak lova...”“Lungngai suh. Ka thiam a lawm! He club hi ka enkawl thei tih i hre lo em ni?”Ka hre ta. A sumdawnna lam min enkawlsaktu hmu ve phâk lo tura ka inngaih avangin hun puma zai ka zuam lo mai mai a lo ni. Min enkawlsaktu an awm dawn te chuan, nuam ka ti takzet a lawm. Lib-i thluak hmangin ka zai dawn a ni. Val hi!Mahni zai zuara vahvaihnaTichuan, ka aw lantirna demo tape kengin recording studio hrang hrangah kan inzui kual tan ta a. Company lianho chuan min lo ûksak vak lo vek a. “Tha fu. Mahse hralh a har ang!” an ti zel mai a. A tir chuan mak hi ka ti khawp mai a. Mahni style country music-ah ngat phei chuan, lawm hlawh ve fe niin ka inhre si a. Hralh ka harna chhan tur hi ka hre lo.Kan han vak zau zel a, thil awmzia kan hrethiam ta. Chutih hun lai chuan, miten an lawm chu country dik tak ni lo, pop music nena inpawlh deuh hi a ni zel a. Kei lah chuan, Country dik tak sak dawn loh ai chuan sak loh law law ka thlang zawk si. Mahse chutih lai chuan Urban Cowboy film a lar thar a, chu chuan country music ngainatna chu tlemin a kaitho a. Chu chu hriain, Shreveport (Louisiana) khuaa record company tereuhte, Paula Records an tihte chuan ka single hmasa ber She’s My Woman tih chu min tlangzarh-sak ta a ni.Lar loh miau chuan mahni record zawrh te hi zah theih pawh a ni lo. Lib-i nen chuan kan record chu car-ah phurin, khawchhak vaukam (east coast) kan fang chhuak vek a, radio station hrang hrangah, deejay kan luhchilh a, kan hla chu vawi khat tal min lo tihchhuahsak ve hrâm turin a ngenin kan ngen kual tawp mai a ni.Zawh ngam loh ZawhnaChutia kawngpui zauva kan pahniha kan inkhalh chhuah lai chuan, Loretta Lynn leh a pasal te pawh khan heti hian an record an lo vahvaihpui tawh a... tih hi ka ngaihtuah a. ‘Pasal’ tih thumal a awm chuan, nupa kar thil tihna a ni tih ka ngaihtuah chhuak thut a. Heti khawp hian Lib-i nen hian kan inzui nasa a, inngaihzawnna lam thu reng reng kan la sawi lo. Mahse, ‘pasal’ tih thumal chuan eng emawni hi min ngaihtuahtir ta tlat mai a ni.Chuta tang chuan Lib-i ka en dan chu a dang tan a. Ani pawhin a hai lo. Chutia melh dan danga ka melh apiang chuan a awmzia hrethiam ni awm tak hian min ‘melh’ ve tan niin ka hria.Chuti taka radio station fan kual peih miau chuan, ka hla chu a chhuak ve ta zauh zauh a, hla lar thlan (country chart) ah te a lang ve tan a, ka zai ngainatna chu ngaithlatute zingah a lo piang ve tan ta a ni.Thil dang pawh a piang. Lib-i nena kan inmamawhna chuan inngainatna a piantir a, inngainatna chuan innêlna, innêlna chuan inngaihzawnna a siam zel a, kan inkawp ta chawt mai a. Inneih rawttu tur chu ka ni tih ka hria. Mahse, he hmeichhia, chirh atanga min kaithova, hlawhtling tura min fuiha, ka vahvaihna kawng chhukchhova a hniak hnutchhiah ve peih hmeichhia hi, ka duh a lawm, mahse ka phu hlawl lo. Ka hmel leh ka aw lam a ni lo, ka nun chuan a phu lo a ni. He hmeichhe kuta inneih zungbun buntir tur hi chuan, amah lamah ni lo, keima lamah chinfel ngai a tam riau.Thilruk leh ruihhlo ka sim leh a, zu ka la sim lo. I ngawl vei zawng zawng i sim loh chuan pasalah ka nei lovang che.. tiin vawi khat mah min kar lo. Mahse, a mita ka en apiang hian “Sim loh chuan... pawi zawk ang!” tih ang deuh hi ka ngaihtuah chhuak ziah mai a. A tawpah zu chu hmangaihnain a chiah zawp a, ka ngawl vei ka sim vek a, a aiah zai leh rimawi chu thûk lehzualin ka luhchilh tan ta a ni.Lar tawk viau tawhTin, radio station hrang hrangah ka hla an saktir ve lauh lauh a, kan khua, Charlotte khuaa ka ‘lar’ chuan ka duhtawk viau mai. Ka beisei phâk aiin ka sang daih tawh a ni. Mahse, Lib-i chuan ‘puan in zauh’ tlâk ni hian min la hre tlat a. Country City enkawl turin manager dang a ruai a, keini pahnih chu country music luhchilh lehzual turin 1981-ah khan a hmunpui Nashville lamah kan pem ta a ni. Kar tawpah hian club enkawl turin kan ‘haw’ ziah a. 1982-ah khan Nashville-ah chuan, a zeina ber mai ‘Nashville Palace’ club enkawl hna thawh tur a hmu ta hlauh mai a, Nashville chu chenchilh turin kan pan tak tak ta a ni.‘Engkimtithei’Zai thiam ringawta, sum neih si loh chu hahthlâk tak a ni. Lib-i pawisa khawlsa zawng zawng chu in luah manah a kal zova. Tirhkah rawihna sum neih tawh bawk si loh chuan, ‘engkimtithei’ nih a ngai tawp. Club-ah chuan ka zai a, ka zai zova, choka-ah thleng ka va sil char char a, sil zawh veleh apron ka hlîp a, ka va zai leh a, kut an ben zawh meuh chuan choka-ah thleng sil tur a lo vûm leh thûr tawh a... Mipui an tin veleh Lib-i chu a inphelh sawk sawk a, bawkkhup takzet hian chhuat a nawt tawrh tawrh ve tho bawk a.Chuti khawpa han beih tak tak chuan zu ngawl te chu teuh lo, meizial takngial pawh a zuka zuk hman a ni lo. Zing lam dar hnih vela Club kan chinfel meuh hi chuan kan hah tawngkhawng tawh a, lu leh lukham a insik rualin ka muhil nghal bawrh bawrh mai thin a ni.Lib-i chu a lo dik. Hah rau rauvah Country music dik tak ngaina chin fuankhawmna Nashville khawpui ngeia hah chu a lo dik tlat. Kan club chuan bawmtu a ngah ve tial tial a. Zaithiam lar Ricky Skaggs leh George Straight te chuan hriat an hlawh chho viau zel a. Chumi rualin kan club chu chawisanin a awm ve zel a, Country music dik tak chuan mi lawm a hlawh ve leh tan ta.Kan nghak chhuak ta!Tichuan, 1985-ah khan Warner Bros.-in min chhuahsak album, 1982 tia a hming kan phuaha hla hmasa ber, Storms of Life chu a lâr ta hluai mai a. Country music rau rauvah, tlangzarh kum veka copy maktaduai chuang hralh awmchhun ka ni ta reng mai a. Chuvangin, Country Music Academy chuan Top New Male Vocalist chawimawina min hlan ta a. Ka rin phak hauh loha sangah ka zai chu a invawrh chhova, 1990-ah chuan album pali ka tlangzarh a, an pali chuan platinum-ah an kai vek a ni.“Tiam Tlat e”Sum ka lo neih tâk deuh vang ni hauh lovin, nghei tur ka nghei kim theih tâk avang leh, ka nun pumpui chu nupui nei tura inpeih nia ka hriat tâk avangin, 1991-ah chuan, Lib-i nena inneih chu ka rawt ta a. Chumi kum chuan kan innei ta a ni.Nashville-ah chuan thian hlui upa tawh tak takte nen hian Lib-i chu inkhawm hunah inkhawm turin an kal ziah thin a. A tir chuan ho ka ti viau a, a hnuah chuan min sawm hian ka kal ve ta fova. Sakhua ka ngaihsak lutuk chuan mi min hriat dan nen a inkalh ang a, ka tan a tha lo vang tih ka hlau deuh a. Mahse, ni khat chu ka han inngaihtuah chiang a, Ka nunah Lib-i kawng min kawhhmuh zingah fuh lo a awm tawh em ni? tiin ka ngaihtuah a, kum nga tang tura ngaih rukrupa kha country music khawvela hriat hlawh phak ka nih theihna turin kawng min kawhhmuh a, tuna biak-in kawng min kawhhmuh pawh hi ka thatna tur a nih ka ring ngam ta thlap mai a ni.Tichuan, Bible chhiar leh tawngtai te, Pathiana rinna nghah te ka zir ve ta zel a, ka chanvo ni ve phâk ngai lo tura ka ngaih thil tha zawng zawngte kha ka tan hian khêkin a lo la awm a ni tih ka han ngaihtuah hian, lawm lo thei ka ni lo - ka ti ta zawk a ni.Ka tha famkim ka ti hauh lo. Mahse, ka hringnun ka han hman chhoh zel hian, ni tinin Lib-i ka mamawhna a zual ang zelin Pathian ka mamawhna a zual a, a ropuizia ka hre ta zel a ni. Chuvangin, ka gospel album hmasa ber Inspirational Journey chu ka lo tichhuak ve ta a ni.Hman deuh khan, “A tir atang khan nang hi chuan hetia pasala min neiha biak-in lama min hruai hi i lo tum reng a ni maw?” tiin ka zawt a.“Ni bik nang! Mahse... Remruattu a awm a ni ngei ang”Ka pian tirh atanga min hretu leh ka ke chheh zawng zawng vengtu chuan heti hian rem min ruatsak a lo ni.